Kultura.az

Azərbaycanda insanların ən çox əziyyət çəkdiyi problemlərdən biri mobil operatorların fəaliyyətidir. Demək olar ki, mətbuatda Azercell, Bakcell və Nar Mobile-ın fəaliyyəti ilə bağlı tənqidi yazı çap olunmur. Qəzetlərin, saytların, TV, radioların işləri kiməsə yaltaqlanmaq yox, fəaliyyətləri təftiş etmək, problemləri qabartmaqdır. Amma bizim mətbuat orqanları ağızlarına su alıb oturublar.

Redaktorlar, jurnalistlər 200-250 manatdan ötrü mobil operatorların əsirinə çevriliblər. İtin qabağına sümük atılan kimi, bunların da aylıq konturlarını atırlar qabaqlarına, onlar da operatorların güllü-çiçəkli, şən xəbərlərini yaymaqla məşğul olurlar. Başqa bir tərəfdən də nə qədər oxucu itirirlər və nəticədə Azercell, Bakcell, Nar öz abunəçiləri ilə istədikləri formada davranır.

Mən bu sahə üzrə mütəxəssis deyiləm. Bununla belə bir vətəndaş kimi qərara gəldim ki, mobil operatorlardan başıma gələnlərdən, gördüyüm problemlərdən yazım. Çünki bu sahə çox bərbad gündədir və yuxarıda qeyd etdiyim kimi, KİV-lərin heç biri bu barədə araşdırma, yazı çap etmək istəmirlər.

Hər kəsə aydındır ki, Azərbaycanda fəaliyyət göstərən mobil operatorların üçü də it günündə xidmət göstərir. Özü də baha qiymətə it günündə. Ola bilər biri biraz pis, biri lap pis. Nəticə odur ki, yaxşı xidmət deyil. Canları çıxır abunəçiləri normal şəbəkə, xidmətlə təmin etməyə. Pul xərcləyib keyfiyyəti qaldırmaq istəmirlər. Hər dəfə də bir hoqqa çıxardıb abunəçilərin cibinə girirlər. Bu yəqin ki əksər istifadəçilərin başına gəlib. Fərqi yoxdur.

“Limiti keçmisiz” bəhanəsi ilə abunəçilərin cibinə girmək

Son ayda elə 2 dəfə mənim başıma gəlib. Biri “Azercell 3G datakart”ına görə, biri isə “Bakcell - Klass” tarif paketinə görə.

Birincidə datakartın aylığını 2 gün idi keçirtmişdim, axşam internet bağlandı. Gedib Gənclikdəki Azercell Ekspresdən maraqlandım ki, nə məsələdir? Dedilər borcunuz var. Bu borcun nədən yarandığını soruşduqda, dedi limiti keçmisiz. 2-3 dədiqəlik dialoqumuz oldu, gördüm müştəri xidməti işçisinin məlumatı azdı, mıqqıldanır, konkret cavab verə bilmir suallarıma, dedim yaxşı aydındır, mərkəzə gedib maraqlanacam. Sonra getdim Tarqovıdakı Azercell Ekspresə. Orda özündənrazı bir qadın oturmuşdu, problemi dedim. Dedi borcunuz var. Amma bu borcun nədən yarandığını bu işçi də mənə aydın deyə bilmədim. Mübahisəmiz yarandı, sonra da dedi ki, sizə ətraflı məlumat verə bilmərik. Çünki datakart sizin adınıza deyil. Bu işçiyə başa sala bilmədim ki, indiyə qədər sizdən əvvəl də məlumatlar verilib, sizin özünüz də vermisiz. İndi nə oldu birdən-birə məlumat vermək qadağan olundu? Başladı kobud formada, “naqlı” cavablar verməyə, dedim yaxşı, kimin adınadır, həmin insanla gələrəm. Bu da bunların “müştəri xidməti”. Vaxtın azlığı ucbatından çox məşğul ola bilmədim məsələ ilə, 5-6 manatı ödəyib interneti açdırdım. Sonra datakartın sahibinə demişdilər ki, birinci aydan ödəniş etməli idiniz, onu etməmisiz. Amma 4 ay idi ki istifadə edilirdi. Dedikləri səbəb də yalan idi.

İkinci belə hadisə isə Bakcell ilə baş verdi. Klass istifadəçiləri bilirlər ki, aylıq 5 manat ödəniş olunmalıdır və bu məbləğin qarşılığında mobil operator bir aylıq istifadə üçün 250 MB internet və 250 sms hədiyyə verir. Təxminən 1 həftə əvvəl axşam balansımı artırdım. Amma heç bir danışıq, sms üçün istifadə etmədim. Yalnız internetdən istifadə etdim. 250 MB internet bir ay geninə-boluna mənə bəs edirdi. Səhər oyanıb görəm ki, 6 manat borcum var. Getdim müştəri xidmətlərinə dedilər internetdən çox istifadə etmisiz, dedim aylığı yaxın günlərdə ödəmişəm və 250 MB-lıq internet paketim var. Dedilər yoxdu, siz limiti keçmisiz. Sonra yenidən balansımı artırdım, internet paketi haqqında məlumat əldə etmək istəyəndə gördüm internet paketi verməyiblər, ona görə də istifadə etdiyim trafikin pulunu hesabımızdan çıxıblar. Həmin gün başqa bir dostumla qarşılaşanda, o da dedi mənə 30 manata yaxın borc yazılıb, getdim məcbur oldum Klassdan Cinə keçdim.

Bunlar adi misallar idi. Yəni bizim gözümüz görə-görə cibimizə girməkləri. Hələ görün bizim xəbərimiz olmadan hansı manipulyasiyaları edib abunəçilərin canından pul çıxarırlar.

“Bakcell hər yerdə əla tutur”?

Bir müddət əvvəl Bakcellin şəbəkəsində problemlərin ortaya çıxdığını daha çox hiss etməyə başladıq. Bu operatorun istifadəçiləri artdı, şəbəkələr daha çox yüklənməyə başladı və problemlər çoxaldı. İnsanlar haqlı olaraq şəbəkədən şikayətlənməyə başladı. Bakcell isə bunun qarşılığında nə etdi? Başladı TV-lərdə gördümüyümüz “Bakcell hər yerdə əla tutur” mesajlı reklamlarını çəkib camaatın beyninə yeritməyə. Keyfiyyəti qaldırmaqdan, marketoloqlarının yüklərini qaldırıblar ki, nə edirsiz edin, insanlarda elə təəssürat yaradın ki, şəbəkəmizdə problem yoxdur. Problem sizin ya qulağınızda, ya gözünüzdə, ya telefonunuzun ekranında, ya da telefonunuzun “kalonka”sındadır.

Guya ən ucqar nöqtələrdə Bakcellin şəbəkəsi əla tutur. Şəhərin mərkəzində gündə əlli dəfə qarşılaşdığımız problemlər qalıb bir tərəfdə, bu operator Dilarə ilə düşüb rayonlara, kəndlərə bizə göstərməyə çalışır ki, şəbəkəmizdə problem yoxdur, hər şey əladır. Bakı boyda şəhərin metro stansiyasında normal bir şəbəkəni qura bilmirlər. Elə stansiyalar var ki, GPRS yoxdu. Özü də bu stansiyalar bir deyil, iki deyil.

Klass nömrəli abunəçilərin Rouming etməsi üçün 100 manat pul köçürülməsini eşidəndə isə elə bil başıma qazan keçirtdilər. 100 manata Rouming olar?! Hansı xüsusi xidmət qarşılığında bunu ödəməliyik biz? Cavab “heç bir”, roumunqin aktivləşməsi üçün istifadəçi 100 manat pul keçirməlidir.

NARdan isə geniş yazmağa ehtiyac yoxdur. Bu operatorun şəbəkəsi paytaxtı, ölkəni normal əhatə etmir. Uzun müddətdir fəaliyyət göstərən operatorların fəaliyyəti pis gündədirsə, bu operatordan danışmağa heç dəyməz. Metronun keçidinə bir addım atan kimi NAR-ın şəbəkəsi itir. Digər xidmətlər isə qalsın bir tərəfə.

Bir müddət əvvəl operatorlarla RİTN arasında 3G xidməti ilə bağlı dava-qırğın gedirdi. Lisenziya əldə olunandan sonra gördük ki, xidmət 1 qəpiklik deyil. Az qala internetdə surət GPRS surətidi, video danışıqdan həmçinin normal istifadə etmək mümkün deyil. İndi də 4G-yə hazırlıq gedir. 3G düzəldi, qaldı 4G.

Nisbətən Azercellin şəbəkəsi yaxşıdı, o da qiyməti qoyub dağın başına və digər xidmətləri pis göstərir. Yuxarıda bəziləri ilə bağlı qeydlər etmişəm.

Mobil operatorlar xidmətin keyfiyyətini artırmaq əvəzinə qızların, qadınların mesajlarını, danışıqlarını kişilərə, kişilərin mesajlarını, danışıqlarını isə qadınlara satmaqla məşğuldular. Pul qazanmağın belə forması da var mobil operatorlarda.

Hələlik mobil operatorlarla bağlı bu qədər.

P.S. Xahiş edirəm, kim hansı mobil operatordan istifadə edirsə, hansı problemlərlə qarşılaşırsa, aşağıdakı e-mailə yazsın, birlikdə araşdıraq, problemləri ictimailəşdirək. Yoxsa biz sakit durduqca, yazmadıqca, danışmadıqca bu sahədə heç bir dəyişiklik, irəliləyiş olmayacaq. Şikayətlərinizi yazın.

[email protected]

Redaksiyadan: Xahiş edirik mobil operatorlardan yazının saytdan çıxarılması üçün bizə təzyiq etməsinlər. Yazı saytdan çıxarılmayacaq. Ağlınız başqalarına getməsin. Biz satılmırıq.

Ülvi Həsənli

Kultura.az

Bizi soyan operatorlar

Uyğun Məqalələr

Counter Strike oynayan gənc də potensial inqilabçıdır.

Ey Amerika, bizə də bomba at!

“İmkan verin yaşayaq!”